Organizata Botërore e Shëndetit parashikon që 9.6 milionë njerëz në Ukrainë të vuajnë nga shëndeti mendor si pasojë e luftës. Një në pesë njerëz që kanë përjetuar luftë kanë probleme me depresionin, ankthin, çrregullim stresi post-traumatik, çrregullim bipolar ose skizofreni.  

Lufta ka ndërprerë shërbimet shumë të nevojshme të shëndetit mendor dhe mbështetjes psikosociale për njerëzit në nevojë. Megjithatë, puna jetike tashmë po vazhdon për të forcuar sistemin e reagimit ndaj emergjencave dhe për të ndërtuar ofrimin e kujdesit parësor dhe komunitar të shëndetit mendor.

“Përafrimi me këtë udhërrëfyes do të sigurojë që ofrimi i shërbimeve të shëndetit mendor për popullsinë në Ukrainë, si dhe zhvillimi i sistemit të shëndetit mendor, do të kryhet në përputhje me praktikat më të mira globale dhe gjithashtu do të kontribuojë në planifikimin dhe shpërndarjen efektive të të gjitha burimeve në dispozicion në këtë drejtim. OBSH është këtu për të qëndruar në Ukrainë dhe do të vazhdojë të punojë me të gjithë partnerët tanë për forcimin e ofrimit të shërbimeve të shëndetit mendor”, tha Dr Jarno Habicht, përfaqësues i OBSH-së në Ukrainë.

Edhe zonja e Parë e Ukrainës, Olena Zelenska, në fjalimin e saj në Asamblenë e 75 -të Botërore të Shëndetësisë, theksoi stresin mendor të përjetuar nga ukrainasit për shkak të luftës në Ukrainë.

Ajo foli për banorët e Kharkiv, të cilët kishin jetuar nën tokë në metro për tre muaj ndërsa qyteti po bombardohej, të cilët nuk mundën “psikologjikisht të ngriheshin”, të largoheshin nga streha dhe të ktheheshin në shtëpitë e tyre.

/rtsh.al/