Turqia akuzon kurdët për shpërthimin e fuqishëm që ndodhi pasditen e 13 nëntorit në një rrugë të populluar pranë sheshit Taksim në Stamboll. Gruaja e cila u akuzua si personi që vendosi bombën u arrestua, ndërsa Ministri i Brendshëm, Suleyman Soylu tha se përgjegjëse për sulmin është Partia e Punëtorëve të Kurdistanit (PKK).

“Ne së shpejti do t’u japim njerëzve një përgjigje për ata që na shkaktuan këtë dhimbje. Nga ana tjetër, hetimet për sulmin nga policia kanë përfunduar”, tha Soylu.

Në detajet e zbuluara më herët nga ngjarja, gruaja e cila dyshohet si autorja e shpërthimit ishte e ulur në një stol për 45 minuta dhe pasi u ngrit bomba shpërtheu menjëherë.

PKK që dyshohet se fshihet pas sulmit është një grup militant që bën thirrje për një shtet të pavarur kurd brenda Turqisë. BE dhe SHBA e konsiderojnë atë si një organizatë terroriste.

Nga shpërthimi humbën jetën 6 persona dhe u plagosën 81 të tjerë, mes të cilëve dy janë në gjendje kritike për jetën.

/rtsh.al/