Parlamenti Europian ka votuar për ratifikimin e marrëveshjes tregtare Brexit midis Bashkimit Europian dhe Britanisë së Madhe, hapi i fundit i madh në miratimin e paktit.

Nga 697 parlamentarë të BE që hodhën votat e tyre, 660 ishin pro, pesë ishin kundër dhe 32 kishin abstenuar, njoftoi Presidenti i Legjislaturës David Sassoli këtë mëngjes.

Marrëveshja e madhe përfshin jo vetëm marrëdhëniet tregtare, por edhe rregullat e konkurrencës, metodat e peshkimit dhe kushtet e ardhshme për policinë dhe drejtësinë, transportin dhe bashkëpunimin energjetik.

Traktati me 1 000 faqe tani pritet të hyjë në fuqi më 1 maj.

Marrëveshja tregtare është zbatuar përkohësisht që nga fillimi i 2021 për të lejuar ligjvënësit e BE të rishikojnë dhe ratifikojnë marrëveshjen. Kjo periudhë hiri skadon më 30 prill, sipas marrëveshjes midis dy palëve.

Parlamenti britanik dha dritën jeshile në dhjetor, menjëherë pas përfundimit të marrëveshjes.

Ligjvënësit e BE kishin kërcënuar më parë për të vonuar më tej ratifikimin për shkak të një mosmarrëveshjeje në vazhdim me Londrën mbi rregullat e veçanta tregtare të rëna dakord për Irlandën e Veriut në Marrëveshjen e Tërheqjes në 2019.

Në një debat përpara votimit të së martës, shumica e parlamentarëve të BE thanë se ata do të mbështesnin marrëveshjen me një zemër të rëndë dhe shpresojnë për një bashkëpunim më konstruktiv në të ardhmen. /AA