Pekini shprehu të shtunën kundërshtim të prerë ndaj deklaratës së përbashkët të bërë nga ShBA-ja dhe Japonia mbi çështjet që lidhen me punët e brendshme të Kinës dhe riafirmoi vendosmërinë e Kinës për të mbrojtur sovranitetin, sigurinë dhe interesat e saj të zhvillimit.

Presidenti amerikan Joe Biden dhe kryeministri japonez Yoshihide Suga publikuan një deklaratë të përbashkët të premten, pas takimit të tyre në Shtëpinë e Bardhë në Uashington. Ata theksuan planin e tyre për “Indo-Paqësorin” dhe shkëmbyen pikëpamjet e tyre mbi ndikimin e veprimeve të Kinës në rajon. Ata gjithashtu shprehën shqetësime për çështjet mbi Detin e Kinës Lindore, Detin e Kinës Jugore dhe Tajvanin, Hong-Kongun e Xinjiang-un e Kinës.

Në përgjigjen e saj, Ministria e Punëve të Jashtme e Kinës u bëri thirrje ShBA-së dhe Japonisë që t’i përmbahen parimit të “Një Kine” dhe të ndalojnë menjëherë ndërhyrjen në punët e brendshme të Kinës dhe dëmtimin e interesave të saj.

Një zëdhënës i Ministrisë së Punëve të Jashtme të Kinës tha në një deklaratë të shtunën se Tajvani dhe ishujt Diaoyu janë pjesë e territorit kinez. Ai shtoi se çështjet e Hong-Kongut dhe të Xinjiang-ut janë punë të brendshme të Kinës dhe Kina ka sovranitet të padiskutueshëm mbi ishujt në Detin e Kinës Jugore dhe ujërat përreth tyre.

Zëdhënësi theksoi se deklarata e përbashkët e udhëheqësve ShBA-Japoni është ndërhyrje e rëndë në punët e brendshme të Kinës dhe shkel rëndë normat themelore që rregullojnë marrëdhëniet ndërkombëtare.