Kryeministri i Mbretërisë së Bashkuar, Boris Johnson, ka këmbëngulur se duhet të pritet me patjetër rezultati përfundimtar i zgjedhjeve, pasi ende shumë vota në vendet vendimtare janë pa u numëruar.

Pas pretendimeve për mashtrim në procesin e numërimit nga Donald Trump, Johnson theksoi se ai kishte besim në kontrollet dhe ekuilibrat e kushtetutës amerikane, si dhe duke bërë të qartë se do të bashkëpunonte me këdo që do të dilte fitues i garës.

Sa i përket deklaratës së Joe Biden, i cili u shpreh i bindur se ai do të merrte drejtimin e shteteve vendimtare si Pensilvaninë dhe Xhorxhian, Johnson tha se duhet pritur për t’u parë rezultati përfundimtar.

I pyetur nëse do t’i mungonte Trump, i cili ka qenë mbështetës i Johnson, nëse ai do të largohej nga ‘Shtëpia e Bardhë’, Johnson tha:

“Le të jemi të qartë, Kryeministri i Mbretërisë së Bashkuar do të punojë gjithmonë shumë, shumë ngushtë me këdo që është Presidenti i Shteteve të Bashkuara dhe ky do të jetë rasti, pavarësisht rezultatit të këtyre zgjedhjeve.”