Nënshkruhet marrëveshja për krijimin e sistemit të pagesave të shpejta në Ballkanin Perëndimor

Sot (10 janar), në ambientet e “Pallatit Koch” në Bankën e Italisë, u zhvillua ceremonia e nënshkrimit të Marrëveshjes së Bashkëpunimit për nisjen e projektit të krijimit të sistemit të pagesave të shpejta në vendet e Ballkanit Perëndimor. Ceremonia u ndoq nga Guvernatori i Bankës së Italisë, Fabio Panetta, Zëvendësguvernatorja, Chiara Scotti, si dhe Guvernatorët dhe Zëvendësguvernatorët e bankave qendrore të Bosnjës dhe Hercegovinës, Kosovës, Maqedonisë së Veriut, Malit të Zi dhe Shqipërisë.
Marrëveshja parashikon që Banka e Italisë të ofrojë një sistem pagesash të shpejta të bazuar në shërbimin TIPS, platformën evropiane për shlyerjen e pagesave në kohë reale, e zhvilluar dhe administruar nga Banka e Italisë në emër të Eurosistemit. Iniciativa është miratuar nga Këshilli Drejtues i Bankës Qendrore Evropiane (BQE), ndërsa Maqedonia e Veriut ka të drejtë të bashkohet me projektin në një datë të mëvonshme.
Sistemi i ri do të mundësojë pagesa në të gjitha monedhat e vendeve pjesëmarrëse dhe do të jetë funksional brenda 18 muajve nga nisja e punës, e planifikuar për javët e ardhshme. Platforma do të krijojë gjithashtu një lidhje dypalëshe për shlyerjen e pagesave midis zonës gjeografike ku operon TIPS dhe Ballkanit Perëndimor, duke ofruar një zgjidhje teknologjikisht të avancuar dhe me kosto të ulëta.
Ky projekt është një hap i rëndësishëm drejt integrimit të vendeve të Ballkanit Perëndimor me sistemin financiar të Bashkimit Evropian, duke mundësuar një infrastrukturë më të avancuar dhe efikase për kryerjen e pagesave ndërkombëtare.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Komentet 0
Ende nuk ka komente. Bëhuni i pari që komenton.




