BB, mbështetje për projekte që përmirësojnë lidhjet tregtare në rajon

Ministri i Ekonomisë, Kulturës dhe Inovacionit, Blendi Gonxhja priti në një takim menaxherin e Zyrës së Bankës Botërore në Shqipëri, Emanuel Salinas.
Gonxhja bëri të ditur se gjatë takimit u diskutua mbi ecurinë e zbatimit të projektit për lehtësimin e tregtisë dhe transportit në Ballkanin Perëndimor.
“Një iniciativë e rëndësishme që po kontribuon ndjeshëm në zhvillimin e infrastrukturës dhe përmirësimin e lidhjeve tregtare në rajon, duke rritur efikasitetin e transportit dhe reduktimin e kostove të tregtisë për bizneset në Shqipëri dhe më gjerë”, tha ministri.
Gjatë takimit, gjithashtu u diskutua dizenjimi i një projekti të ri në bashkëpunim me Bankën Botërore, i cili do të mbështesë zhvillimin e tregtisë dhe ekonomisë shqiptare në vitet e ardhshme.
“Ky projekt synon të sjellë investime të rëndësishme në drejtim të integrimit me tregun e përbashkët europian, me qëllim përmirësimin e konkurrueshmërisë në treg dhe përmbushjen e standardeve që kërkon tregu i BE-së”, informoi ministri.
Ky bashkëpunim afatgjatë me Bankën Botërore dhe partnerët e tjerë strategjikë, shtoi ministri, përbën një hap të madh drejt një ekonomie më të qëndrueshme dhe konkurruese për të gjithë qytetarët.
/ rtsh.al /
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Komentet 0
Ende nuk ka komente. Bëhuni i pari që komenton.




