Në mbledhjen e fundit të Këshillit Bashkiak të Korçës për këtë vit, u miratua buxheti i vitit 2024. Me një vlerë totale prej 2,25 miliardë lekë buxheti i bashkisë së Korçës për vitin 2024 synon realizimin e projekteve të rëndësishme për të mbështetur turizmin, bujqësinë, teknologjinë dhe edukimin:

“Nëpërmjet këtij buxheti ne synojmë të mbështetim sektorët kryesore, prioritar të ekonomisë tonë lokale dhe nëpërmjet këtyre do mbështetim punësimin dhe krijimin e të ardhurave për të gjitha familjet. Synimi i dytë i këtij buxheti është të krijojmë kushtet për të mbajtur të rinjtë dhe të rejat në bashkinë tonë. Këto janë dy sfidat tona”, tha kryetari i bashkisë Korçë, Sotiraq Filo.

Buxheti i bashkisë Korçë për vitin 2024 është 8,5% më i lartë se një vit më parë, ndërsa 41,5% e tij do të përdoret për shpenzimet për personelin, 44,8% janë shpenzimet korrente, 12% janë shpenzimet për investime dhe 1,7% e buxhetit do të përdoret për shpenzimet për principalin dhe interesin e kredisë. Buxheti është miratuar vetëm me votat e të majtëve, pasi opozita e ka votuar kundër me arsyetimin se buxheti nuk i plotëson pritshmërinë dhe parashikimet për realizimin e investimeve, ndërsa sipas të djathtëve ky buxhet nuk ka parashikuar përkrahje për shtresat në nevojë, pensionistët dhe të rinjtë.

/RTSH/