Piramida është gati të hapë dyert për të gjithë ata të rinj që duan të aftësohen në teknologjinë digjitale.  Lajmin e dha Kryetari i Bashkisë së Tiranës, Erion Veliaj, gjatë fjalës në Forumin Ekonomik të Izraelit.

“Muajin tjetër do të hapim zyrtarisht qendrën më të madhe të teknologjisë digjitale, kryesisht për adoleshentët, mosha 12-18 vjeç, të cilët do të përgatiten për punët e së ardhmes” tha zoti Veliaj. “Është një ndërtesë ikonike e Tiranës, e konceptuar si mauzoleum për ish-diktatorin, e cila i ka kaluar të gjitha fazat: nga një qendër e NATO-s, në një klub me emrin “Mumja”, te një rrëshqitëse e madhe në natyrë e një zonë e braktisur, sot është zona që do të gëlojë nga rinia, punët dhe dijet e së ardhmes” tha ai.

Me këtë rast kreu i Bashkisë së Tiranës tha se kryeqyteti shqiptar do të kthehet në epiqendrën e teknologjisë në Ballkan. Zoti veliaj tha se kompanitë më në zë izraelite janë të ftuara të vijnë në Tiranë, edhe në Zonën e Lirë Ekonomike, TEDA, e para dhe e vetmja e licencuar në Shqipëri.

“Sot kemi filluar punimet edhe në Zonën e Lirë Ekonomike – TEDA. Jemi bashkia e parë, e vetme për momentin, që është licencuar nga qeveria shqiptare për të qenë operator i një zone të lirë ekonomike dhe jam shumë krenar që, në fakt, kompanitë e para që kanë aplikuar dhe që po përgatiten të marrin lejet për të filluar kapanonët e tyre janë kompani nga Izraeli, kryesisht që merren me transferimin e serverave e shumë rrjeteve sociale të Ballkanit në Tiranë”, u shpreh më tej kryetari i bashkisë.

/ rtsh.al /