Ulja e vlerës së monedhës europianë euro, kundrejt monedhës vendase lek po vë në vështirësi industrinë përpunuese. 

Konfederata e industrive në vend ngre shqetësimin se zhvlerësimi me 15 % i euros brenda vitit, po i çon ata drejt falimentit. 
Grupimi i industrive vendase kërkojnë ndërhyrjen e Bankës së Shqipërisë në këtë situatë. 

“Konfindustria i kërkon Bankës së Shqipërisë, që në zbatim të përgjegjësive ligjore të hetojë për përgjegjësit e mundshëm dhe të marri masat e nevojshme përkatëse kundër spekullatorëve potencialë aktorë të sistemit financiar, bankar dhe/ose jashtë tij. Gjithashtu, i kërkohet agjensive ekzekutive për të ndjekur me përgjegjësi spekullimet e mundshme në tregun e valutave, duke kontrolluar origjinën e rrymave të parave informale të pranishme.” bën të ditur ajo në një deklaratë.

Konfindustria, ka shprehur shqetësimin e saj për ndikimin e fortë negativ të fuqizimit të lekut kundrejt euros në disa prej kategorive të rëndësishme të biznesit në vend. 

“Janë prekur sektorë të rëndësishëm të ekonomisë vendore, kryesisht prodhues dhe eksportues, si industria e manifakturës, tekstile, këpucë, prodhime bujqësore, agrobujqësore, të shërbimeve më pakicë, etj.. Një pjesë e madhe e tyre rrezikohen deri me falimentim dhe/ose largim nga vendi. “ thekson deklarata.

Konfindustria vlerëson se  fuqizimi jonormal i Lek-ut ka fuqizuar ndjeshëm importet.

Gazetare Teuta Shamku