Çdo ankesë ndaj një procedure prokurimi apo tenderi pranë Komisionit të Prokurimit Publik, nga çdo operator ekonomik, do t’i nënshtrohet rregullave dhe tarifave të reja të pagesës.

Ankesa e paraqitur pranë autoritetit ose entit kontraktor, si dhe Komisionit të Prokurimit Publik, nga çdo operator ekonomik, i cili ka ose ka pasur interes në një procedurë prokurimi dhe kur është dëmtuar ose rrezikohet të dëmtohet nga veprimet ose mosveprimet e autoritetit ose entit kontraktor, do të duhet të përmbajë bashkëlidhur edhe dokumentin bankar, që vërteton pagesën e tarifës përkatëse për ankesën.

Për shqyrtimin e ankesës, operatori ekonomik ankimues detyrohet të paguajë pranë Komisionit të Prokurimit Publik tarifën, sipas përcaktimeve të mëposhtme:

1. Kur ankesa paraqitet për dokumentet e tenderit, 0.4 % të vlerës së procedurës së prokurimit që ankimohet;
2. Kur ankesa paraqitet për vendimin e vlerësimit, klasifikimit përfundimtar ose vendimin e përzgjedhjes së kandidatëve pas fazës së parakualifikimit, 0.5 % të vlerës së procedurës së prokurimit që ankimohet;
3. Kur ankesa paraqitet për pavlefshmërinë e kontratës, 0.5 % të vlerës së kontratës së nënshkruar.

“Parapagimi i tarifës nga operatori ekonomik ankimues ose operatori ekonomik i interesuar është kusht i domosdoshëm për pranimin dhe shqyrtimin e ankesës. Në rastet e moskryerjes së pagesës, autoritetit ose entit kontraktor dhe Komisionit të Prokurimit Publik i lind e drejta e mospranimit të ankesës së paraqitur nga operatori ekonomik ankimues ose operatori ekonomik i interesuar.”- thuhet në vendimin për ankimimet ndaj një procedure prokurimi pranë Komisionit të Prokurimit Publik.

Në çdo rast, pagesa e tarifës i kthehet operatorit ekonomik ankimues ose operatorit ekonomik të interesuar, i cili ka kundërshtuar vendimin e autoritetit ose entit kontraktor, nëse ankesa e tyre është pranuar plotësisht ose pjesërisht nga Komisioni i Prokurimit Publik, brenda 5 ditëve nga marrja e vendimit nga ana e Komisionit të Prokurimit Publik.

Në rastin kur ankesa nuk pranohet, të ardhurat e arkëtuara nga tarifa e ankimimit derdhen 100% në buxhetin e shtetit.

/rtsh.al/