Kryetari në detyrë i Partisë Demokratike, Enkelejd Alibeaj ka hapur këtë të enjte (20 prill) fushatën elektorale në Kavajë. Në fjalën e tij në takimin me strukturat e degës së PD në Kavajë, Alibeaj ka deklaruar se kjo forcë politike të cilën ai drejton, është e besueshme pasi i qëndron vlerave.

Alibeaj tha se të gjithë ata që janë pjesë e strukturave të PD e kanë këtë veçori, atë të meritës së votës dhe besimit të qytetarëve. Alibeaj theksoi se e keqja e Shqipërisë ka emrin e Edi Ramës.

Më tej, ai u shpreh se arsyeja përse sot vendi qeveriset nga Rama, dhe fakti që sot PS mban 60 bashki, është prej gabimit të PD në zgjedhjet e 2019-ës.

“Edi Rama dhe Edi Ramat e vegjël nëpër bashki, që fatkeqësisht sot janë në 60 bashki fal gabimit tonë fatal në zgjedhjet e 2019-ës që nuk u futëm në zgjedhje. E pra, këto kanë qenë sjellje, qëndrime, pozicione tonat për të mirën jo vetëm të demokratëve, por të të gjithë shqiptarëve”, tha Alibeaj.

Ky i fundit u ndal dhe te vrasja e Ardian Nikulajt në Shëngjin, ku bëri përgjegjës mungesën e ligjit, shtetit dhe humbjen e shpresës.

Më tej, Alibeaj komentoi dhe situatën në PD, dhe atë të cilën e quajti ‘martesa Berisha-Meta’.

Sipas kreut demokrat, Berisha e pati më të lehtë që t’i shërbejë Ilir Metës, se sa demokratëve.

“Dhe është e papranueshme për Partinë Demokratike që të arrijë sot nga një pjesë që të merret për hallet personale, e të meret të shkojë tek një parti e majtë. Ku tek Ilir Meta! Ilir Meta nuk ishte ky që në 2013-ën qeveriste me Partinë Demokratike. Ishte ai I cili i la demokratët në baltë dhe shkoi bëri martesën e radhës me Edi Ramën. Ajo që vuajm ne sot, prej 10 vitesh pothuajse, nuk është gjë tjetër veçse është një regjim i cili vjen sipas edukatës politike të ish-bllokut”, tha Alibeaj.

/rtsh.al/