Kryeministrja e Zelandës së Re, Jacinda Ardern, tha se vendet duhet të punojnë së bashku në mënyrë që procesi global i rimëkëmbjes ekonomike të mund të vazhdojë në mënyrë efektive pas pandemisë së koronavirusit (COVID-19), raporton Anadolu Agency.

Gjatë adresimit në samitin e Bashkëpunimit Ekonomik Azi-Paqësor (APEC) 2020, Ardern rikujtoi se pandemia COVID-19 ka shkaktuar një numër vështirësish ekonomike në gjithë botën.

Ajo gjithashtu theksoi se anëtarët e APEC deri më tani kanë pranuar zgjidhje për problemet e tyre ekonomike duke shkëmbyer përvoja dhe ide.

“Adresimi i problemeve ekzistuese ekonomike në botë të shkaktuara nga COVID-19 sigurisht që do të kërkojë metoda të reja”, tha Ardern, duke shtuar se Zelanda e Re do të punojë me anëtarët e APEC gjatë procesit.

“Në një botë ku nuk mund të udhëtojmë për shkak të COVID-19, forcimi i bashkëpunimit me partnerët tanë rajonalë është jetik për përshpejtimin e rimëkëmbjes ekonomike të Zelandës së Re”, tha Ardern.

Ajo gjithashtu theksoi se shumë njerëz humbën punën e tyre dhe humbën të ardhurat e tyre gjatë pandemisë.

“Ne duhet të veprojmë në mënyrë që APEC të përqendrohet në rritjen ekonomike gjithëpërfshirëse dhe të qëndrueshme. Prandaj, në përputhje me vizionin e tij të ri, ne presim që anëtarët e APEC të veprojnë më vendosmërisht për këtë çështje”, tha Ardern.

Samiti i APEC, i organizuar nga Malajzia këtë vit, po mbahet online për shkak të pandemisë COVID-19 dhe bashkon 21 vende nga rajoni i Paqësorit, të cilët përbëjnë rreth 60 për qind të produktit të brendshëm bruto global (PBB).