Një agjente e shërbimeve postare që operonte në qytetin e Korçës dhe Pogradecit është vënë nën pranga nga policia pasi akuzohet për mashtrim të disa bizneseve dhe përvetësim të shumave të konsiderueshme ku dyshohet se ka përvetësuar shumën prej 3 milion euro.

46-vjeçarja, me detyrë agjente e shërbimeve postare private, shpërndante pako të ndryshme postare, për llogari të bizneseve dhe shumat monetare që i arkëtonte nga klientët, nuk i ka derdhur në llogarinë e subjekteve tregtare shitëse dhe as tek kompania që kryente këtë shërbim.

Shumën e konsiderueshme të përfituar, agjentja dyshohet se e ka investuar në blerjen e pasurive të paluajtshme dhe të bizneseve tregtare, në emër të vet dhe të familjarëve të saj.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

/rtsh.al/