Kreu i PD-së, Lulzim Basha në fjalën e tij në Asamblenë Parlamentare të Këshillit të Europës e vuri theksin për më shumë mbështetje për Ukrainën. Ai tha se nëse dështohet me mbështetjen ndaj Ukrainës, rreziku është i larët dhe se “Ballkani do të jetë i radhës”.

“Mos gaboni, rreziku është i lartë. Nëse dështojmë për të mbështetur dhe fuqizuar Ukrainën do ta paguajmë shtrenjtë. Ballkani do të jetë i radhës. Një tentativë tashmë e dështuar për grabitjen e territorit dhe ndryshimin e kufijve ndodhi në Shtator të vitit të kaluar. Nuk është një incident i izoluar. Është një përpjekje për të ndryshuar arkitekturën e sigurisë në Ballkanin Perëndimor dhe sabotuar mbrojtjen Euro-Atlantike të kësaj arkitekture të sigurisë”, tha Balla.

Ndalur te shkatërrimi që ka shkaktuar lufta, Basha tha se Federata Ruse duhet të mbahet përgjegjëse për kompensimin e humbjeve njerëzore dhe materiale.

“Siç është deklaruar tashmë nga Asambleja Parlamentare në Rezolutën “Për sigurimin e një paqe të drejtë në Ukrainë dhe sigurisë së qëndrueshme në Europë”, kjo do të përfshijë ngritjen e një mekanizmi të kompensimit të plotë, duke përfshirë një komision ndërkombëtar për ekzaminimin e pretendimeve për dëmet e regjistruara në Regjistrin e Dëmeve dhe një fond kompensimi për të paguar vendimet për dëmshpërblim të dhëna nga Komisioni, veçanërisht duke konfiskuar dhe vënë në dispozicion pasuritë e Federatës Ruse për të paguar për dëmet e luftës në Ukrainë. Kjo do të mundësojë përdorimin e këtyre pasurive si një mjet për të detyruar shtetin agresor të përmbushë detyrimet e tij ndërkombëtare”, tha Basha.

/rtsh.al/