Bashkimi Evropian dënoi arrestimin nga Moska të gazetarit të “Wall Street Journal”, Evan Gershkovich.

“Gazetarët duhet të lejohen të ushtrojnë lirisht profesionin e tyre dhe meritojnë mbrojtje. Autoritetet ruse demonstrojnë sërish shpërfilljen e tyre sistematike për lirinë e medias”, tha kryediplomati i BE-së Josep Borrell në një postim në Twitter.

Liderët e tjerë botërorë kanë shprehur gjithashtu shqetësim për arrestimin.

Kjo është hera e parë që një gazetar amerikan arrestohet me akuza nga Moska për spiunazh që nga periudha e Luftës së Ftohtë.

Ministria e Jashtme franceze tha të enjten se Parisi ishte “veçanërisht i shqetësuar dhe ne kemi pasur mundësinë në disa raste të dënojmë qëndrimin represiv të autoriteteve ruse ndaj shtypit, qoftë rus apo ndërkombëtar, i pranishëm në Rusi”, tha një zëdhënës.

“Ne do të vazhdojmë të përcjellim mesazhin e mbrojtjes së lirisë së shtypit dhe t’u bëjmë thirrje autoriteteve ruse të respektojnë të drejtat themelore, përfshirë ato që lidhen me lirinë e informacionit”, theksoi shtoi zëdhënësi i Ministrisë së Jashtme franceze.

/rtsh.al/