Ish-kryeministri Berisha ka bërë thirrje nga ballkoni i shtëpisë së tij nga ku drejton protestën e përditshme se më 20 shkurt në Tiranë do të mbahet protestë e madhe ndaj qeverisë.

“20 shkurti ka një simbol të madh për një gjeneratë të tërë, domethënia është thjesht në fushën e erudicionit, por për gjeneratën para tyre, përmbysja e shtatorit të diktatorit më gjakatar, ishte në të vërtetë momenti magjik, momenti hyjnor kur opozita shqiptare u bë opozitë e vërtetë.

Ndaj dhe u zgjodh 20 shkurti për ditën e protestës së madhe. Zvarritja e diktatorit pa diskutim ishte një hakmarrje e njerëzve të shtypur për kasaphanën e luftës së klasave, për gjëmën që i kishte bërë shqiptarëve”, u shpreh Berisha.

Sipas Berishës, 20 shkurti është dita e provës së madhe. Ndërsa ftoi të gjithë shqiptarët kudo ku jetojnë.

“Ndaj dhe ftesa ime për çdo qytetar shqiptar: më 20 shkurt, në ditën e provës së madhe në Tiranë, në orën e fitores në Tiranë.

Thirrja ime për të gjithë shqiptarët kudo që janë, kudo që janë, në Europë, Amerikë dhe kudo, 20 shkurti ju fton në ditën e betejës së madhe, ditën e lirisë.

O sot o kurrë, të shpëtojmë Shqipërinë!

Shqipërinë, liritë tona, të drejtat tona, do t’i mbrojmë vetë, do i meritojmë vetëm në rast se i mbrojmë”, tha më tej Berisha.

/rtsh.al/