Ish-kryeministri Sali Berisha ka deklaruar se kryeministri Rama po dërgon në Parlament ligjin që shkatërron pasuritë shekullore të vendit.

Duke folur si çdo ditë nga dritarja e shtëpisë së tij drejtuar demokratëve, Berisha tha se qeveria po i vërsulet trashëgimisë shekullore të vendit që sipas tij, do bëhen ndërtime me paratë e drogës.

“…tani me tonelatat e parave të drogës, për të shkatërruar trashëgiminë shekullore mijëravjeçare. Për të shkatërruar trashëgiminë që brez pas brezi na u le ne, dhe detyra jonë është ta ruajmë, ta mbrojmë dhe tua lëmë brezave që vijnë”, u shpreh Berisha. ‘

Sipas Berishës, këtë gjë kryeministri Rama po e kthen në ligj që rrezikon pasuritë e Shqipërisë.

“Por barbari, i zhveshur nga çdo moral, i zhveshur nga çdo interes tjetër përveç drogës dhe krimit, çon në parlament ligjin për shkatërrimin e tyre, pasurive përrallore të këtij vendi.

Atyre pasurive që e bëjnë Shqipërinë një prej vendeve më të pasura të botës”, tha Berisha.

Gjithashtu, ai bëri thirrje për protestën e 20 shkurtit, që sipas Berishës opozita po përballet me vjedhjet dhe skandalet e qeverisë.

“Miqtë e mi, kjo betejë në çdo lloj prizmi dhe aspekti është shpëtimtare.

20 shkurti është dita e qytetarëve!

Propaganda banale e Edi Ramës për të mbrojtur vjedhjet, aktet, skandalet e tij dhe të ministrave të tij, u bie nga mëngjesi deri në darkë borive, altoparlantëve se ne jemi njëlloj.

Nuk ka mashtrim më të madh se ky”, tha Berisha.

/rtsh.al/