Policia Kufitare dhe njësia policore në Durrës u kanë ardhur në ndihmë 12 personave, të cilët rrezikuan të mbyteshin në det teksa po lundronin me dy skafe.

Një prej mjeteve lundruese në të cilin ndodheshin 8 pasagjerë, tre prej tyre të mitur, pësoi defekt në mes të detit në Vilun, ndërsa skafi tjetër me 4 pasagjerë u përplas me gurët dhe rrezikoi të fundosej në vendin e quajtur “Bishti i Pallës”.

Pasagjerët e dy mjeteve lundruese ndodhen në gjendje të mirë shëndetësore.

“Shërbimet e Policisë Kufitare Shëngjin dhe të Policisë Kufitare Velipojë, pas njoftimit nga një shtetas se mjeti lundrues skaf me të cilin ai po lundronte bashkë me 7 shtetas të tjerë, kishte pësuar defekt në plazhin e Vilunit, dhe e kishte të pamundur të dilte në breg të detit, kanë shkuar menjëherë në adresën e dhënë, me një mjet lundrues të Policisë Kufitare.     

Gjithashtu, shërbimet e Policisë Kufitare Durrës kanë marrë njoftim se një tjetër mjet lundrues skaf me 4 pasagjerë, ishte përplasur me disa gurë në vendin e quajtur “Bishti i Pallës” dhe rrezikonte të fundosej pasi kishte futur ujë,” thuhet në njoftim.

/rtsh.al/