Bashkia e Shkodrës dhe Enti Kombëtar i Banesave po intensifikojnë  përgatitjet për ndërtimin e një blloku banesash sociale në këtë qytet.

Kryetari i bashkisë së Shkodrës, Benet Beci, drejtori i përgjithshëm i EKB-së, Stefan Çipa  inspektuan zonën ku do të ngrihen ndërtesat sociale që do të shërbejnë për strehimin e familjeve në nevojë, si dhe për shërbimet komunitare.

Në fjalën e tij Çipa tha se “falë bashkëpunimit të filluar mes Entit kombëtar të Banesave me Bashkinë e Shkodrës do të fillojmë në këtë zonë urbane ndërtimin e banesave sociale me kosto të ulët. Do të fillojmë sa më shpejt për të ndërtuar banesën e parë me 6 kate në Shkodër e pastaj për të vazhduar me banesa të tjera”.

Kryebashkiaku Beci theksoi se bashkia ka vënë në dispozicion truallin pasi zgjidhjen e problemit të strehimit të pastrehëve e konsideron prioritet.

“Janë dy modele, një godinë me 6 kate dhe një me 8 kate, që janë aplikuar. Është shumë e rëndësishme që katet e para të përdoren për nevoja sociale si kopshtet. Shpresojmë të vazhdojmë me shpejtësi zbatimin e këtyre banesave sociale”, tha kryebashkiaku Benet Beci.

/ rtsh.al /