Fermerët e fushës së Maliqit kanë arritur të shesin pjesën më të madhe të prodhimit të qepës së këtij viti, por sipas tyre, çmimi i shitjes është më i ulët se ai i një viti më parë. Në qoftë se vitin e kaluar 1 kilogram qepë, gjithnjë sipas fermerëve, është shitur nga 400 deri në 500 lekë, këtë vit 1 kilogram qepë nuk shkon më shumë se 320 lekë.

Rritja e kostos së prodhimit për shkak të rritjes së çmimit të imputeve bujqësore, por dhe çmimit në rritje për fuqinë punëtorë, ka bërë që fermerët të mendojnë të ulin sipërfaqet e mbjella me qepë sezonin e ardhmen. Fermerët theksojnë se e kanë të vështirë për të përcaktuar llojin e kulturës bujqësore që do të kultivojnë, për shkak të kostos së lartë dhe mungesës së tregut.

Burime zyrtare nga drejtoria e bujqësisë në bashkinë e Maliqit bëjnë me dije se prodhimi i qepës këtë vit ka qenë i mirë dhe se në fushën e Maliqit janë mbjellë 750 ha me qepë, duke qenë një nga kulturat kryesore që fermerët e kësaj zone kultivojnë, pas grurit dhe patates.

/RTSH/