Presidenti Ilir Meta ka mbështetur kërkesat e Finlandës dhe Suedisë për t’u anëtarësuar në NATO. Me një postim në Facebook, Meta i bën thirrje Qeverisë dhe Kuvendit që të marrin masa për përfundimin sa më parë të procedurave, për miratimin sa më të shpejtë të kërkesave së të dy vendeve.

Për Metën, anëtarësimi i në NATO i Finlandës dhe Suedisë, do të forcojë sigurinë.

“Mbështes fuqimisht kërkesat e Finlandës dhe Suedisë për t’u anëtarësuar në NATO, të paraqitura sot zyrtarisht Sekretarit të Përgjithshëm Stoltenberg nga Ambasadorët respektivë.  I bëj thirrje Qeverisë dhe Kuvendit të Shqipërisë të marrin të gjitha masat për përfundimin sa më parë të procedurave dhe akteve përkatëse ligjore në funksion të miratimit sa më të shpejtë të kërkesës së dy vendeve për anëtarësim.  Anëtarësimi në NATO i  Finlandës dhe Suedisë, dy vende të konfirmuara si kampione të lirisë dhe të të drejtave të njeriut, do të forcojë sigurinë e përbashkët dhe do t’i japë një vlerë të shtuar parimeve demokratike që e bëjnë NATO-n, Aleancën më të madhe dhe të suksesshme politiko-ushtarake në botë”, shkruan Meta.

Suedia dhe Finlanda kanë dorëzuar zyrtarisht sot (18 maj) kërkesat e tyre për t’u anëtarësuar në NATO.

/rtsh.al/