Finlanda shpallet për të nëntin vit radhazi vendi më i lumtur në botë
Raporti i vitit 2026 për vendet më të lumtura në botë ka konfirmuar edhe një herë dominimin nordik. Finlanda renditet sërish në krye, duke mbajtur vendin e parë për të nëntin vit radhazi. Pas saj vijnë Islanda dhe Danimarka, ndërsa Kosta Rika ka surprizuar duke u ngjitur në vendin e katërt, si vendi më i lumtur në Amerikën Latine.
Top 10 plotësohet nga Suedia, Norvegjia, Holanda, Izraeli, Luksemburgu dhe Zvicra. Ndërkohë, asnjë vend anglishtfolës nuk ka arritur të futet në dhjetëshen e parë për të dytin vit radhazi: SHBA renditet në vendin e 23, Kanadaja në 25 dhe Britania e Madhe në 29.
Raporti bazohet në sondazhin Gallup World Poll në 147 vende, duke marrë parasysh faktorë si PBB për frymë, jetëgjatësia, bujaria, perceptimi i lirisë dhe korrupsionit. Një element shqetësues është rënia e lumturisë tek të rinjtë nën 25 vjeç në SHBA, Kanada, Australi dhe Zelandën e Re, e lidhur me përdorimin e mediave sociale.
Në fund të renditjes, Afganistani mbetet vendi më pak i lumtur në botë, pasuar nga Sierra Leone, Malawi, Zimbabve dhe Botsvana.
Ky raport i përvitshëm nënvizon se lumturia nuk lidhet vetëm me pasurinë materiale, por edhe me ndjenjën e komunitetit, sigurinë sociale dhe besimin tek institucionet.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Të ngjashme
Të fundit
