FMN publikon raportin: Shqipëria me performancë pozitive, por sfidat mbeten

Ekonomi | 2 vite më parë

Fondi Monetar Ndërkombëtar (FMN) vlerëson përparimin ekonomik të Shqipërisë, duke theksuar një rritje të fortë të Prodhimit të Brendshëm Bruto (PBB) prej 3,9% në 2023 dhe projeksione mesatare prej 3,5% deri në 2029, të nxitura nga turizmi, ndërtimi dhe konsumi i brendshëm.

Inflacioni, sipas raportit, është në rrugën drejt uljes në 2% deri në fund të 2024, ndërsa borxhi publik pritet të bjerë në 50% të PBB-së deri në vitin 2029.

Sistemi financiar konsiderohet i qëndrueshëm dhe i mirëkapitalizuar.

Megjithatë, FMN-ja paralajmëron për një sërë sfidash që kërcënojnë rritjen afatgjatë.

Plakja e popullsisë, emigracioni masiv dhe produktiviteti i ulët mbeten probleme madhore, ndërsa qeverisja dhe transparenca kërkojnë përmirësime të thella.

Rritja e kredive në sektorin e pasurive të paluajtshme dhe ekspozimi i bankave ndaj kredimarrësve të mëdhenj përbëjnë rrezik të mundshëm për stabilitetin financiar.

FMN-ja thekson nevojën për reforma të thella, përfshirë forcimin e administrimit fiskal dhe transparencës në investimet publike.

Përshpejtimi i integrimit europian kërkon avancimin e qeverisjes, modernizimin e arsimit dhe trajnimeve profesionale, si dhe promovimin e energjisë së rinovueshme.

Sipas raportit, ndërhyrjet në strategjitë kundër korrupsionit dhe përmirësimin e infrastrukturës janë thelbësore për të siguruar një rritje të qëndrueshme dhe gjithëpërfshirëse.

Gazetar: Omer Saraçi

/rtsh.al/


Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.

Të ngjashme