Vetëm 21 kilometra nga Pogradeci, buzë liqenit të Ohrit shtrihet fshati Lin, tepër i veçantë dhe mjaft i vizituar nga turistët.

Shtëpitë e vogla ngjitur me ujin, rrugicat e ngushta dhe zhurmat e njerëzve, i japin një pamje më mikluese këtij destinacioni piktoresk.

Turistët e huaj tregojnë arsyet se përse kanë zgjedhur Linin për të kaluar pushimet e tyre.

Veç ambienteve të fshatit të këndshëm, në Lin ofrohet dhe turizmi historik. Pak javë më parë aty u zbulua gjurmë të vendbanimeve të lashta, që për arkeologët ndërkombëtarë është ndër më të vjetrat në Evropë me moshë mbi 8500-vjeçare.

Pikërisht këto arsye, por edhe ushqimi i mirë dhe liqeni i pastër që ndodhet përbri, janë faktorët sipas banorëve të zonës se përse fshati i tyre po frekuentohet gjithnjë e më shumë.

Në Lin ka edhe disa plazhe të vogla që shquhen për ujërat e kristalta e qetësinë mes bimësisë së egër dhe peizashit magjepsës.

Gazetar: Marjo Merhori

/RTSH/