Një aksident i 3-fishtë ka ndodhur në aksin Pogradec-Qafë Thanë, ku si pasojë kanë mbetur të plagosur 4 persona. Ngjarja ka ndodhur një ditë më parë pranë fshatit Pojskë, ku drejtuesi i mjetit tip “Benz” ka humbur kontrollin dhe është përplasur me mjetin tip “Toyota” dhe mjetin tip “Opel”.

Si pasojë kanë mbetur të plagosur drejtuesi i mjetit tip “Benz”, 38-vjeçari R. H. dhe pasagjeri K. B., 27 vjeç, si dhe dy pasagjeret në mjetin tip “Toyota” N. H., 38 vjeçe dhe K. H., 37 vjeçe.

Të plagosurit janë dërguar në Spitalin e Traumës në Tiranë, për mjekim më të specializuar dhe janë jashtë rrezikut për jetën.

Për ngjarjen ka nisur hetimi për 38-vjeçarin që drejtonte mjetin tip “Benz”, i cili ka qenë edhe shkaktari fillestar i aksidentit.

Materialet procedurale i kaluan Prokurorisë pranë Gjykatës së Shkallës së Parë Pogradec, për veprime të mëtejshme.

/rtsh.al/