Incidenti me turistët italianë, të cilët ikën pa paguar darkën nga një restorant në Berat, e ka turpëruar kryeministren e Italisë, Giorgia Meloni.

Kështu u shpreh të shtunën (19 gusht) shefja e qeverisë italiane me një reagim në rrjetet sociale.

Meloni tha se ishte vënë në dijeni të videos nga vetë kryeministri Edi Rama, që vetë ka deklaruar se ia kishte treguar më shumë si një shaka.

“Më erdhi turp, sepse Italia që dua të përfaqësoj nuk është Komb qe e bën veten të përflitet jashtë për gjëra të tilla, që nuk respekton punën e të tjerëve, që mendon se mund të qeshë duke ua hedhur të tjerëve. Ndaj vendosa t’i kërkoj ambasadorit të shkonte të merrte faturën, të cilën e pagova personalisht.

Megjithatë kjo në Itali ka krijuar edhe polemika, sepse ka një opozitë që me sa duket preferon një tjetër imazh të Italisë,” reagoi kryeministrja italiane në Facebook.

Pamjet e katër turistëve italianë teksa largoheshin me vrap nga restoranti u publikuan nga pronari i biznesit, i cili u shpreh, megjithatë, se klientët e tij kishin mbetur të kënaqur me ushqimin.

/rtsh.al/