Papa Françesku u lut sot për viktimat e shkaktuara nga Shteti Islamik në bastionin e dikurshëm të grupit terrorist në Irakun e Veriut. Kjo e dielë është dita e tretë e vizitës së 84-vjeçarit në Irak, ku komuniteti i krishterë është zvogëluar pas viteve të luftës dhe persekutimit. Papa shkoi në Mosul, i cili ishte pushtuar nga Shteti Islamik nga 2014 në 2017. “Nëse Zoti është Zoti i paqes – sepse kështu është – atëherë është e gabuar që ne të bëjmë luftë në emrin e tij”, tha papa Françesku në Hosh al-Bieaa. “Nëse Zoti është Zoti i dashurisë – sepse kështu është – atëherë është e gabuar që ne të urrejmë vëllezërit dhe motrat tona”, theksoi ai. “Sot, ne ngremë zërin tonë në lutje Zotit të Plotfuqishëm për të gjitha viktimat e luftës dhe konfliktit të armatosur. Këtu në Mosul, pasojat tragjike të luftës dhe armiqësisë janë shumë të dukshme”, tha ai.