Uashingtoni u ka kërkuar qytetarëve amerikanë që ndodhen në Emiratet e Bashkuara Arabe dhe në Rajonin e Lindjes së Mesme të tregojnë vigjilencë të lartë, për shkak të rritjes së rrezikut nga sulmet e armatosura të grupit rebel Huthi të Jemeni-t, i cili mbështetet nga Teherani.

Ambasada e Shteteve të Bashkuara në Emiratet e Bashkuara Arabe publikoi një paralajmërim të ri sigurie në rrjetin social X. Në këtë deklaratë, misioni diplomatik vë në dukje rrezikun e shtuar të sulmeve ushtarake, si dhe përpjekjet e mundshme të Iranit për të shënjestruar zyrtarët e qeverisë amerikane në rajon.

Përveç kërcënimeve të drejtpërdrejta të sigurisë, ambasada udhëzoi shtetasit amerikanë të jenë të përgatitur për pengesa të mundshme në udhëtime, përfshirë anulimin e fluturimeve komerciale dhe mbylljen e papritur të hapësirave ajrore.

Tensionet janë rritur pas një sërë sulmesh të kryera nga Huthit ndaj infrastrukturës kritike dhe aeroporteve civile në Arabinë Saudite.

Për këtë arsye, edhe misioni diplomatik amerikan në Arabinë Saudite lëshoi një paralajmërim të ngjashëm pak më parë, duke bërë thirrje për kujdes maksimal.

Zyrtarët amerikanë vazhdojnë të ndërmarrin masa parandaluese, ndërsa u bëjnë thirrje qytetarëve të tyre që të ndjekin me vëmendje njoftimet zyrtare të departamenteve të sigurisë dhe të shmangin zonat me risk të lartë.

/rtsh.al/