Sekretari amerikan i Thesarit, Scott Bessent, është larguar nga banesa e tij në Uashington dhe është zhvendosur në një bazë ushtarake, pas kërcënimeve ndaj jetës së tij që dyshohet se vijnë nga Irani. Lëvizja është ndërmarrë për arsye sigurie, pasi autoritetet amerikane kanë vlerësuar se planet iraniane për të goditur zyrtarë aktualë dhe ish-zyrtarë amerikanë kanë hyrë në një fazë më të avancuar.

Lajmi u raportua fillimisht nga The New York Times, duke cituar tre persona të njohur me çështjen, të cilët folën në kushte anonimiteti për shkak të ndjeshmërisë së informacionit.

Sipas zyrtarëve amerikanë, shqetësimi për kërcënimet është rritur gjatë javëve të fundit. Megjithatë, shkalla konkrete e rrezikut ndaj Bessent nuk është bërë publike. Shërbimet amerikane të inteligjencës vlerësojnë se Irani ka kapacitete të kufizuara për të organizuar sulme në shkallë të gjerë në territorin amerikan, por kërcënimet e drejtpërdrejta ndaj individëve po trajtohen me seriozitet.

Departamenti amerikan i Thesarit konfirmoi zhvendosjen e sekretarit, duke deklaruar se ai nuk do të tërhiqet përballë kërcënimeve të regjimit iranian dhe do të vazhdojë zbatimin e fushatës ekonomike kundër Teheranit.

Bessent është një nga figurat kryesore të strategjisë së administratës Trump për të izoluar ekonomikisht Iranin. Që prej gushtit, ai ka drejtuar fushatën e sanksioneve dhe kufizimeve financiare, të njohur si “Operation Economic Outcast”, që synon të dobësojë ekonominë iraniane dhe të kufizojë të ardhurat e regjimit.

Në kuadër të kësaj strategjie janë vendosur edhe kufizime ndaj rrugëve tregtare të Iranit dhe është zbatuar bllokada detare ndaj porteve iraniane. Roli i tij në këtë fushatë e ka kthyer Bessent në një prej zyrtarëve amerikanë që, sipas raportimeve, përbën objektiv të mundshëm të kërcënimeve nga Teherani.

Zhvendosja e sekretarit të Thesarit nuk është rasti i parë i këtij lloji në administratën Trump. Të paktën gjashtë zyrtarë të lartë janë larguar më parë nga banesat e tyre në zonën e Uashingtonit dhe janë vendosur në baza ushtarake ose ambiente të tjera të mbrojtura. Mes tyre janë edhe shefi i stafit të Shtëpisë së Bardhë, Stephen Miller, dhe ish-prokurorja e përgjithshme Pam Bondi.

Shqetësimet për sigurinë janë shtuar në një kohë kur inteligjenca amerikane ka paralajmëruar për avancimin e planeve iraniane kundër personelit dhe qytetarëve amerikanë. Një memorandum i një zyrtari të lartë të inteligjencës, i shqyrtuar nga Reuters në fund të tetorit, fliste për komplote që kishin arritur në faza të avancuara.

Ndërkohë, Irani ka mohuar më parë akuzat për organizimin e atentateve ndaj zyrtarëve amerikanë ose personave në territorin e SHBA-së.