Bashkia Elbasan do të jetë të enjten në qendër të punës së Komisionit të Ankimimeve dhe Sanksioneve, i cili do të shqyrtojë kërkesën Ankimore, të koalicionit “Bashkë Fitojmë”.

Ky koalicion kërkon pavlefshmërinë e zgjedhjeve  në zonën zgjedhore Bashkia Elbasan, si dhe kundërshton vendimin e KZAZ-së për miratimin e Tabelës Permbledhëse të Rezultateve për zgjedhjen e kryetarit të Bashkisë dhe për Këshillin e Bashkisë, në Zonën Zgjedhore Bashkia Elbasan, në zgjedhjet e 14 majit 2023.

“Bashkë Fitojmë” kërkon ekspertimin kompjuterik të çdo pajisjeje elektronike që është e pajisur me server për ruajtjen e të dhënave elektronike.

“Kjo të realizohet nga ekspertë të huaj të pavarur nga institucionet shtetërore apo Komisioni Qëndror i Zgjedhjeve. Për këtë nevojitet që pajisjet të ruhen në kushte të përshtatshme në gjendjen aktuale me qëllim mosndërhyrjen nga personat e paautorizuar si dhe të mirëruajtura nga agjentët atmosferikë.”- thuhet në ankimim.

“BF” kërkon edhe krahasimin e rezultatit elektronik të zgjedhjeve me rezultatin fizik (fletëve të votimit të gjendura në kuti) për çdo qendër votimi.

Në kërkesë përfshihet edhe kqyrja e kamerave të jashtme dhe të atyre të përdorura brenda qendrave të votimit me qëllim, sipas ankimimit, “evidentimin e të gjithë personave të paautorizuar apo pjesë e administratës vendore dhe qëndrore në nivel specialist apo drejtuesi, që kanë qënë gjatë gjithë kohës nëpër qendra votimi”.

“BF” kërkon edhe evidentimin e mosnënshkrimit të deklaratave përkatëse për votuesit që janë shoqëruar, si dhe evidentimin e votimit nga vetë Operatorët e PEVN-ve, të komisionerëve për llogari të votuesve.

“Krahasimin e kodeve të votuesve me listën e votuesve për çdo QV në Bashkinë Elbasan, në lidhje me pajisjen e identifikimit të votuesve (PED).  Rinumërimin dhe rivlerësimin e votave në të gjitha qendrat e votimit te njësisë zgjedhore, Bashkia Elbasan dhe miratim i tabelës përmbledhëse për zonën zgjedhore Bashkia Elbasan duke përfshirë në të rezultatin e dalë nga rinumërimi dhe rivlerësimi i votive”- thuhet në ankimim.

“Bashkë Fitojmë” kërkon pavlefshmërinë e zgjedhjeve të zhvilluara në zonën zgjedhore Bashkia Elbasan.

Zgjedhjet e 14 majit në Bashkinë e Elbasanit i dhanë fitoren kandidatit të PS-së, Gledian Llatja me 56.38% të votave të vlefshme, ndërsa kandidati i koalicionit “Bashkë Fitojmë”, Luçiano Boçi mori 43.62% të votave.

/rtsh.al/