Incidentet e fundit me Jet Ski dhe mjete të tjera ujore sportive kanë alarmuar autoritetet në Durrës. Për të parandaluar rreziqet dhe për të mbrojtur sigurinë e pushuesve, është formuar një strukturë e posaçme, Task-Forca, e cila përbëhet nga përfaqësues të institucioneve vendore dhe ka për detyrë monitorimin e sezonit turistik.

“Të gjitha instancat vendore kanë të gjithë kapacitetin për të qenë në terren. Ne do të jemi 3 muajt e verës çdo ditë si Task-Force por edhe si plan pune  duke mirë menaxhuar situatat që do të ketë sezoni turistik”, u shpreh Oltsen Gripshi, koordinator i strukturës Task-Force.

Në plazhet e Durrësit janë angazhuar 190 vrojtues të licencuar nga federata e vrojtuesve të plazhit. Ata do të mbikëqyrin pushuesit dhe do të ndihmojnë në parandalimin e incidenteve gjatë gjithë sezonit veror.

“Ai kufizimi i plazhit me bovat, për sa i përket zonës së notimit duhet të respektohet nga sipërmarrësit privat të cilët shfrytëzojnë këto hapësira por edhe përgjegjësia e turistëve dhe pushuesve”, tha ai.

Në vijën bregdetare të qarkut Durrës janë ngritur 10 vendbazime të dedikuara për mjetet motorike ujore sportive. Katër prej tyre ndodhen në plazhin e madh të Durrësit, një në Currila, ndërsa pjesa tjetër janë të vendosura në zonën e Shkëmbit të Kavajës dhe në Gjirin e Lalzit, për të siguruar një sezon turistik të sigurt dhe të qetë.

/rtsh.al/