Trupat inspektuese të Autoritetit Kombëtar të Ushqimit në bashkëpunim me Krimin Ekonomik Korçë, kanë ushtruar kontroll dhe kanë ndaluar mbrëmjen e së premtes  një individ, i cili transportonte me automjet tip kamionçinë, mish lope pa vulë dhe pa çertifikatë veterinare. 

Lajmi u njoftua në rrjetet sociale nga vetë Autoriteti Kombëtar i Ushqimit.

Automjeti me të cilin transportohej mishi nuk plotësonte kushtet higjieno-sanitare për transportin e produkteve me origjinë shtazore. 

Personi përgjegjës nuk ishte i regjistruar në organet përkatëse për të kryer tregtimin dhe transportin me mjet frigoriferik të mishit.

Për shkeljet e konstatuara, trupa inspektuese e AKU-së, vendosi masë administrative “gjobë” në vlerën e 600’000 lekë dhe bllokim i mishit me destinacion asgjësimin. 

Autoriteti Kombëtar i Ushqimit siguron konsumatorët, se po vijon pandërprerë kontrollet në terren në garantim të sigurisë ushqimore, thekson njoftimi.

Task Forca për Sigurinë Ushqimore është në territor në të 12 qarqet e vendit në mbikqyrje të operatorëve të biznesit ushqimor të prodhimit, përpunimit, magazinimit dhe tregtimit. “Punë e përditshme për siguri ushqimore të shtuar dhe mbrojtje të shëndetit për konsumatorët tanë, pushuesit vendas e të huaj” shkruan ministrja e bujqesisë dhe zhvillimit rural Frida Krifca. 

/ rtsh. al /