Ministri i Brendshëm Taulant Balla ka zhvilluar sot një takim me anëtarin e Parlamentit Europian, Andrey Novakov.

Takimi me zyrtarin bullgar u përqendrua te bashkëpunimi në luftën kundër krimit ndërkufitar.

Shqipëria dhe Bullgaria ndajnë një korridor rrugor të quajtur Korridori VIII, e cila nis me Shqipërinë në Adriatik, vijon në Maqedoninë e Veriut dhe mbyllet në qytetin Varna të Bullgarisë, me dalje në Detin e Zi.

“Vlerësuam arritjet në jetësimin e Korridorit VIII, i cili është një nga dhjetë ‘korridoret trans-europiane’, të cilat janë konceptuar për të lehtësuar shkëmbimin e mallrave, njerëzve, naftës dhe furnizimit me energji midis vendeve të BE-së, shteteve të Ballkanit që kanë dalje në Detin e Zi.

Gjithashtu është shumë i rëndësishëm intensifikimi i bashkëpunimit të strukturave ligjzbatuese në luftën kundër çdo forme të krimit ndërkufitar dhe trafiqeve të paligjshme,” njoftoi ministri Balla në rrjetet sociale.

/rtsh.al/