Pak ditë pasi Beogradi aplikoi edhe në terren premtimin për të lejuar makinat me targa të Kosovës në territorin e Serbisë, Qeveria e Kosovës ka bërë të njëjtën gjë për makinat me targa serbe, duke i lejuar ato të qarkullojnë në territorin e saj me targa serbe të pambuluara duke respektuar reciprocitetin që kryeministri Albin Kurti e kërkon në vazhdimësi.

Pas vendimit të Prishtinës zyrtare, tensionet mes dy vendeve pritet që të ulen ndërsa qeveria e Kosovës thekson në një deklaratë zyrtare se “heqja e regjimit të letër ngjitëseve është akt i fqinjësisë së mirë dhe vjen pas njohjes së plotë të targave të Republikës së Kosovës nga Serbia”.

Marrëveshja për lejimin e makinave me targat e dy vendeve ishte arritur në vitin 2011, por Serbia nuk e lejonte aplikimin në territorin e saj duke u bindur përfundimisht në 25 dhjetor të vitit të kaluar dhe fillimisht kryeministri i Kosovës, Albin Kurti theksoi se do të priste aplikimin në terren nga ana e Beogradit duke u shfaqur skeptik fillimisht.

Mbulimi i simboleve të Serbisë dhe të Kosovës në targat e makinave ishte reflektim i marrëveshjes të përkohshme të arritur më 30 shtator të vitit 2021 me ndërmjetësimin e Bashkimit Evropian, marrëveshje kjo që pasoi tensionet në veriun e Kosovës që pasuan vendimin e qeverisë në Prishtinë që të mos lejojë lëvizjen e makinave me targa Serbe.

Gjithsesi, pavarësisht aplikimit të marrëveshjes për targat, Beogradi këmbëngul se kjo masë lidhet me lëvizjen e lirë të makinave por nuk ka asnjë lidhje me negociatat mes palëve për çështje të tjera më thelbësore.

Gazetar: Olsi Karagjozi

/rtsh/