Aktori i njohur britanik Tim Curry, i cili mbetet në memorien e kinematografisë për interpretimin e personazheve eksentrikë e të jashtëzakonshëm në teatër dhe ekran — përfshirë rolin e Dr. Frank-N-Furter në “The Rocky Horror Picture Show” dhe atë të portierit vigjilent te “Home Alone 2: Lost in New York” — është ndarë nga jeta në moshën 80-vjeçare.

Lajmi është konfirmuar nga menaxherja dhe mikja e tij e hershme, Marcia Hurwitz, e cila bëri me dije se aktori ndërroi jetë të mërkurën në shtëpinë e tij në Los Angeles. Curry pësoi një goditje në tru në vitin 2012 që e detyroi të përdorte karrocë me rrota gjatë viteve të fundit të jetës.

Nga “Rocky Horror” te rolet e mëdha të skenës

Curry u bë një figurë kulturore me rolin e Frank-N-Furter në mjuzikalin fantastiko-shkencor “The Rocky Horror Picture Show”, i cili debutoi në skenën e Londrës në vitin 1973 për të kaluar më pas në Broadway dhe në filmin klasik të vitit 1975.

Gjatë karrierës së tij të pasur artistike, aktori fitoi tre nominime për çmimet “Tony” (për “Amadeus”, “My Favorite Year” dhe “Spamalot”) si dhe një nominim për çmimin “Emmy” në vitin 1994.

“Më pëlqen të luaj me cepat më kuriozë të mendjes dhe sjelljes njerëzore, pjesërisht sepse janë pak më interesante,” do të shprehej Curry për The Associated Press gjatë një interviste në vitin 1993.

Ndër rolet e tij më të spikatura në ekran përfshihen gjithashtu interpretimi i përbindëshit Pennywise në miniserialin “It” (1990), Kardinali Richelieu te “The Three Musketeers” (1993), Wadsworth te “Clue”, si dhe dhjetëra role si dublues zëri në produksione të njohura plot sukses.

/rtsh.al/