Presidenti rus Vladimir Putin ka deklaruar se Rusia po përballet me një moment shumë të vështirë. Në fjalimin e tij para dhomave të përbashkëta të parlamentit rus, Putin ka bërë një pasqyrim mbi situatën e luftës në Ukrainë dhe vlerësim të shkaqeve që e sollën atë.

Në një përpjekje për të mbrojtur operacionin e tij special ushtarak në Ukrainë, presidenti rus theksoi se trupat kanë punuar për të garantuar sigurinë në tokat historike të vendit. Më tej, Putin u shpreh se “Ngjarjet historike do të përcaktojnë të ardhmen e vendit tonë… secili prej nesh është i lidhur me një përgjegjësi të madhe”.

Sipas CNN, Presidenti deklaroi se Rusia u përpoq të zgjidhte konfliktin në rajonin e Donbasit me mjete paqësore, por sipas tij, angazhimi i Perëndimit për paqen doli të ishte “mashtrim” dhe një “gënjeshtër mizore”.  Putin pretendon se Kievi po përpiqej të grumbullonte armë biologjike dhe bërthamore.

“Ne po bënim gjithçka që ishte e mundur për ta zgjidhur këtë problem në mënyrë paqësore, duke negociuar një rrugëdalje paqësore nga ky konflikt i vështirë, por pas shpine po përgatitej një skenar krejt tjetër. Ata [Perëndimi] thjesht po luanin për kohën, duke mbyllur sytë ndaj vrasjeve politike, keqtrajtimit të besimtarëve”, tha ai.

Fjalimi i Putin vjen pas vizitës së papritur që Presidenti amerikan Joe Biden zhvilloi në Kiev, ku u takua me Presidentin Volodymyr Zelensky dhe përsëriti mbështetjen e SHBA ndaj Ukrainës. Presidenti Biden ndodhet këtë të martë (21 shkurt) në Poloni për të takuar liderët evropianë për të mbledhur mbështetjen perëndimore për Ukrainën.

/rtsh.al/