Kishte kërkuar ta mbyllte vitin me një rezultat pozitiv dhe të enjten në mbrëmje ia ka dalë, teksa ka thyer rekordin kombëtar të garës së 3,000 m me pengesa, që e mbante po vetë. E teksa dëmtimi që kishte pësuar prej 3 javësh e pati penguar në finalen e kësaj gare pak ditë më parë në Kampionatit Botëror të Atletikës, që u mbajt në kryeqytetin e Hugarisë, Budapest, aty ku u detyrua të kënaqej me vendin e 8-të në botë, të enjten ajo ka kapërcyer veten, duke shkruar një tjetër kapitull të artë të historisë së atletikës shqiptare.

Këtë herë Gega ka spikatur në garën e radhës së evenimentit prestigjioz, “Diamond League”, të mbajtur në Zyrih. Kampionia kuqezi ka fiksuar kohën 9:09.64 në garën e mbrëmjes së të enjtes, duke stampuar kështu rekordin e radhës në një karrierë të pabesueshme. Luiza përmirëson me thuajse një sekondë kohën e saj të mëparshme, 9:10.27, të cilën e kishte regjistruar një vit më parë në Kampionatin Botëror në SHBA. Duhet theksuar se edhe në “Diamond League” Luiza nuk ishte në formën e saj më të mirë fizike, pasi ende nuk e ka kapërcyer plotësisht dëmtimin.

Megjithatë ajo bëri një paraqitje mbresëlënëse, teksa në garën e radhës në “Diamond League” morën pjesën atletet më të mira të botës. Me kohën 9:09.64, Gega u klasifikua në vend të 4-t, ndërsa i gjithë podiumi i Zyrihut u formua nga treshja e parë e Botërorit të Budapestit, teksa në vend të parë u rendit keniania Mutile Uinfred Yavi, e cila përfaqëson Bahrejnin dhe pas saj erdhën dy sportistet e Kenias, Beatris Çepkoeç dhe Faith Çerotiç.