30.000 maturantët i janë nënshtruar këtë të martë provimit të tretë të Maturës Shtetërore, atij të matematikës. Herët në mëngjes janë paraqitur në institute arsimore dhe i janë drejtuar korridoreve dhe palestrave të monitoruara me kamera sipas një grafiku të përcaktuar më herët nga qendra e shërbimeve arsimore. 

Ashtu siç ka ndodhur edhe në provimet e tjera, 30 minuta pasi maturantët kanë hyrë në provim ka qarkulluar në rrjetet sociale varianti A dhe B i tezes së matematikës.

Të pyetur pas testimit, maturantët konfirmojnë se pyetjet e tezes së publikuar kanë qenë të njejta me ato që kanë dhënë në provim, edhe pse kjo nuk i ka shërbyer atyre për zgjidhjen e ushtrimeve. 

Provimi është cilësuar nga maturantët i një niveli mesatar vështirësie.

Të 60 pyetjet e provimit kanë qenë me alternativa dhe zhvillim ashtu siç ishte njoftuar edhe më parë dhe maturantët janë shprehur se koha e vendosur në dispozicion prej 2 orësh e gjysëm ishte e mjaftueshme, për të zgjidhur gjithçka.

Vështirësia e pyetjeve në provimet e Maturës Shtetërore është e përshkallëzuar sipas nivelit të nxënësve.

40% të pyetjeve janë për nivelin e 5 dhe 6, 40% të tjera për nivelin mesatar dhe 20% janë pyetje të vështira që ndajnë nxënësit e 9-s nga ata të 10-s.

5 ditë më vonë më, 19 qershor, maturantët do t’i nënshtrohen provimit të fundit të maturës, atij të lëndës me zgjedhje.

Gazetare: Keti Toroveci

/RTSH/