Kjo vjen pasi agjencia njoftoi shkarkimin e disa prej stafit të saj mbi akuzat për përfshirje në sulmet e Hamasit të 7 tetorit.

Qeveria e Mbretërisë së Bashkuar tha se është “e tmerruar” nga akuzat e bëra nga Izraeli.

SHBA, Australia, Italia dhe Kanadaja kanë pezulluar tashmë fondet shtesë për agjencinë e OKB-së.

UNRWA thotë se ka urdhëruar një hetim mbi informacionin e dhënë nga Izraeli.

“Mbretëria e Bashkuar është e tmerruar nga pretendimet se stafi i UNRWA-s ishte i përfshirë në sulmin e 7 tetorit kundër Izraelit, një akt i urryer terrorizmi që qeveria e Mbretërisë së Bashkuar e ka dënuar vazhdimisht”, tha në një deklaratë Ministria e Jashtme e Mbretërisë së Bashkuar.

“Mbretëria e Bashkuar po ndalon përkohësisht çdo financim të ardhshëm të UNWRA ndërsa ne i shqyrtojmë këto pretendime në lidhje me pretendimet”.

Edhe Departamenti amerikan i Shtetit më parë njoftoi se po pezullonte fondet shtesë për agjencinë e OKB-së, duke thënë se ishte “jashtëzakonisht i shqetësuar” nga pretendimet për përfshirjen e stafit të OKB-së në sulme.

BE tha gjithashtu se do të vlerësojë hapat e mëtejshëm “bazuar në rezultatin e hetimit të plotë dhe gjithëpërfshirës”.

Sekretari i Përgjithshëm i OKB-së Antonio Guterres tha se ishte “i tmerruar nga ky lajm”.

Kreu i UNRËA, Philippe Lazzarini, tha se një hetim i plotë mbi akuzat po kryhej “për të gjetur të vërtetën pa vonesë”.

Lazzarini shtoi: “Për të mbrojtur agjencinë dhe që të vazhdojë të ofrojë ndihmë humanitare, unë kam marrë vendimin për të përfunduar menjëherë kontratat e këtyre anëtarëve të stafit”.

Ai tha se çdo personel që zbulohet se ka qenë i përfshirë në “akte terrori” do të mbahet përgjegjës.