Dy punonjës të OSHEE janë arrestuar nga Policia pas publikimit të një videoje në një emision investigativ, ku shfaqeshin duke i marrë para një person, me qëllim rimbursimin e energjisë elektrike dhe ndryshimin e tarifimit për biznesin e tij.

Dy punonjësit, konkretisht 54 dhe 63-vjeç kanë kryer veprën penale “Korrupsioni pasiv i personave që ushtrojnë funksione publike”. Policia ka sekuestruar 500 mijë lekë dhe 3 celularë.

“Në lidhje me rastin e transmetuar  mbrëmë, në emisionin investigativ “Fiks Fare”, që bënte fjalë për 2 punonjës të OSHEE-së, të cilët i kanë marrë shuma të ndryshme parash, një shtetasi, me qëllim rimbursimin e energjisë elektrike dhe ndryshimin e tarifimit për subjektin e tij (furrë buke), ju bëjmë me dije se:     

Specialistët e Seksionit për Hetimin e Krimeve Ekonomike dhe Financiare, pas publikimit të pamjeve filmike, organizuan punën në drejtimin e Prokurorisë së Posaçme Kundër Korrupsionit dhe Krimit të Organizuar, për kapjen dhe vënien përpara përgjegjësisë ligjore të shtetasve që shfaqen në video.       

 Në vijim të veprimeve, specialistët e Seksionit për Hetimin e Krimeve Ekonomike dhe Financiare të DVP Tiranë arrestuan shtetasit:

– A. P., 54 vjeç dhe R. K., 63 vjeç, të dy banues në Tiranë, për veprën penale “Korrupsioni pasiv i personave që ushtrojnë funksione publike”.

Në cilësinë e provës materiale u sekuestruan 500 000 lekë dhe 3 celularë”, thuhet në njoftim.

/rtsh.al/