OKB-ja ka thënë se mijëra civilë janë bllokuar në Severodonetsk me një furnizim të pakët të ujit të pastër, kanalizimeve dhe energjisë elektrike, shkruan Evening Standard.

Civilët, duke përfshirë gra, të moshuar dhe fëmijë, po përballen me një krizë humanitare pas javësh të bombardimeve intensive ruse në qytetin e rrethuar në rajonin Luhansk të Ukrainës lindore.

Një situatë urgjente po zhvillohet në fabrikën kimike Azot në qytet, ku besohet se qindra njerëz po kërkojnë strehim në bunkerët e improvizuar poshtë uzinës.

Një zëdhënës i zyrës së OKB-së për Çështjet Humanitare, Saviano Abreu, tha për BBC se qyteti i goditur po i mbaron shërbimet bazë.

Dega humanitare e OKB-së tha se po fillonte të bënte përgatitjet për dërgimin e ndihmave për të bllokuarit në qytet.

Megjithatë, me luftimet intensive që nuk treguan shenja lehtësimi, OKB-ja tha se aktualisht nuk ka akses apo garanci për të shkuar në mënyrë të sigurtë te civilët.

“Mungesa e ujit dhe kanalizimeve është një shqetësim i madh. Është një shqetësim i madh për ne, sepse njerëzit nuk mund të mbijetojnë për një kohë të gjatë pa ujë, “tha zoti Abreu për BBC News.

Ai tha gjithashtu se shërbimet ushqimore dhe shëndetësore janë në rrezik të mbarimit.

Rusia tha se do të krijojë një korridor humanitar të mërkurën në një përpjekje për të evakuuar civilët e bllokuar në uzinë, megjithatë nuk ka pasur asnjë konfirmim se kjo ka shkuar përpara.

Kremlini tha se civilët do të dërgoheshin në rajonin separatist të Luhansk, në Donbas.

Guvernatori i rajonit të Luhanskut, Serhiy Haidai, tha se rreth 500 civilë mbeten në terrenin e uzinës Azot, 40 prej të cilëve janë fëmijë.

Severodonetsk, një qendër kryesore prodhuese dhe ka qenë nën bombardime intensive gjatë javëve të fundit ndërsa lufta për kontrollin e Donbasit intensifikohet. (Sipas Evening Standard)