Duke folur gjatë një aktiviteti në Moskë, presidenti rus Vladimir Putin tha se nuk kishte plane për të sulmuar ndonjë vend evropian, por ishte i përgatitur t’u përgjigjej sulmeve të Perëndimit nëse ishte e nevojshme, duke iu referuar territorit rus Kaliningradit të vendosur mes dy anëtarëve të NATO-s,

Polonisë dhe Lituanisë. Deklarata erdhi pas stërvitjeve të fundit ushtarake të NATO-s pranë enklavës ruse në baltik, të cilat Aleanca i ka përshkruar si ushtrime mbrojtëse për të forcuar parandalimin e sulmeve të mundshme.

Këto ushtrime kanë shkaktuar shqetësime të forta në Moska, e cila paralajmëroi në fund të shtatorit se do të hakmerrej nëse NATO do të përpiqej të bllokonte enklavën e saj nga ajri ose deti. “Stërvitjet e njëpasnjëshme në Detin Baltik dhe përpjekjet për të ndaluar anijet dhe mjetet tona lundruese, të gjitha këto janë akte përshkallëzuese.

Më pas filluam të dëgjojmë deklarata në lidhje me rajonin e Kaliningradit”- tha shefi i Kremlinit. “Nëse bëhet fjalë për një sulm të drejtpërdrejtë kundër Federatës Ruse, në këtë rast në Kaliningrad dhe ndoshta në disa territore të tjera, sigurisht që çështja e përdorimit të të gjitha armëve në arsenalin e vendit tonë do të jetë pjesë e agjendës sonë. Kjo është e pashmangshme”- paralajmëroi ai duke iu referuar edhe armëve bërthamore.

NATO, disa vende evropiane dhe Mbretëria e Bashkuar e kanë akuzuar Rusinë për kryerjen e një lufte hibride kundër tyre, duke përfshirë sulme kibernetike, sabotim dhe përpjekje spiunazhi, që synojnë të reduktojnë mbështetjen e tyre për Ukrainën.

Sulmet e fundit me dronë ukrainas mbi rafineritë ruse të naftës kanë çuar në mungesa të mëdha karburanti dhe vetë Putin e pranoi se goditjet e Kivit po ndikonin negativisht në ekonominë e vendit të tij.

/rtsh.al/