Gazeta prestigjioze amerikane “New York Times” i ka kushtuar një artikull Rivierës Shqiptare duke përshkruar vendet më piktoreske të saj.

Duke u ndalur në Dhërmi, gazetarja e New York Times shkruan se aty ka gjetur restorante që shërbejnë ushqime deti të freskëta dhe me çmime të arsyeshme.

 “Unë kam shkuar nga Ibiza në Kroaci. Dhe kam kaluar shumë kohë në Indi, dhe tani Goa është gjithashtu shumë e zënë. Dhe Greqia është kaq e shtrenjtë tani”, tha Annabel Turbutt-Day, 38 vjeçe, një drejtore e çështjeve të korporatave nga Londra.

 “Shqipëria është ende pak e pazbuluar dhe pak më e përballueshme”, tha ajo.

New York Times interviston edhe ministren e Turizmit dhe Mjedisit, Mirela Kumbaro sipas së cilës tani Shqipëria po tregon fytyrën e vërtetë në turizëm.

“Mjedisi i sotëm miqësor për turistët është në kontrast të thellë me Shqipërinë e fillimit të viteve 1990, pasi ajo doli nga katër dekada izolim si një nga vendet më të varfra pas Perdes së Hekurt. Pasoi edhe një krizë ekonomike. Dhe, e gjithë kjo e la Shqipërinë me një reputacion si një vend i rrezikshëm dhe i mbushur me krime.

“Imazhi i Shqipërisë nuk ishte ai i vërteti”, tha Mirela Kumbaro, ministre e Turizmit dhe Mjedisit të vendit.

“Ishin vetëm pjesët e këqija. Tani, Shqipëria dëshiron të tregojë fytyrën e saj reale”, tha ajo.

“Kala është një nga ambasadorët tanë më të mirë”, tha Kumbaro, e cila ishte larguar nga festivali për një konferencë shtypi, duke ndjekur hapat e zyrtarëve të tjerë, përfshirë kryeministrin Edi Rama”, theksoi ajo.

Media prestigjioze amerikane teksa iu referohet shifrave të Ministrisë së Turizmit dhe Mjedisit shkruan se në vitin 2022, një rekord 7,5 milionë njerëz vizituan vendin, duke shpenzuar rreth 3,1 miliardë dollarë, krahasuar me 6,4 milionë dhe 2,4 miliardë dollarë në vitin 2019.

Dhe në tre muajt e parë të vitit 2023, Shqipëria përjetoi një rritje prej 54 për qind të vizitorëve krahasuar me të njëjtën periudhë të vitit 2019, sipas Organizatës Botërore të Turizmit.

“Shumë prej atyre turistëve nisen drejt qyteteve turistike dhe plazheve të Rivierës Shqiptare, të cilat po tërheqin kërkuesit evropianë të diellit dhe detit, të cilët e shohin ishullin grek të Korfuzit dhe Dubrovnikut, Kroaci, shumë të shtrenjtë dhe të mbushur me njerëz. Në Instagram dhe TikTok, influencuesit krahasojnë peizazhin detar të Shqipërisë me atë të Maldiveve ose Balit”, shkruan New York Times.

Megjithatë, vërshimi i vizitorëve po ngre gjithashtu frikën për dëmtimin e mundshëm të florës dhe faunës së rajonit.

Në qytetin e Vlorës, rreth një orë me makinë nga Dhërmiu, një projekt ndërtimi aeroporti që qeveria promovon si një mënyrë për të sjellë më shumë turistë në Rivierën Shqiptare është përballur me protesta nga grupet mjedisore që thonë se mund të rrezikojë vendet e shenjta për zogj si flamingot dhe pelikanë.

/rtsh.al/