Udhëtimi në mal dhe ngjitja në lartësi është e shoqëruar me ndjenjën e adrenalinës për personat që dashurojnë natyrën e egër. Mali i Taraboshit është një mundësi e mirë për ta përjetuar atë.  Kështu zgjodhën të bënin një grup bjeshkatarësh nga Kosova nën udhëheqjen e guidës nga klubi “Taraboshi Shkodër” Lodovik Zefi.

Ngjitja zgjati gati 3 orë. Ajo nisi nga ura e Bunës (monument kulture) deri në majën e Golishit në Tarabosh, malit me një lartësi prej 651 m që gjendet në skajin jugperëndimor të liqenit të Shkodrës.

Shkodra nga kjo pikë shikohet si në pëllëmbë të dorës, së bashku me liqenin e saj, më i madhi në Ballkan ndërsa nga e njëjta pikë në majën e Taraboshit mund të shikosh edhe detin Adriatik. Veç ajrit të pastër, mbushur me oksigjen, panorama duket e mrekullueshme nga kjo lartësi.

Niveli i vështirësisë nga pikënisja në majë konsiderohet i përballueshëm nga të gjithë. Andi nga Peja është 12 vjeç dhe ai nuk e pati aspak të vështirë ngjitjen.

“Nuk është hera e parë pasi kam ngjit male edhe herë të tjera, por në Shqipëri është hera e parë. Eksperienca ishte shumë e bukur”, u shpreh djali.

Peizazhi i larmishëm malor, me kalime në sfond nga ai lumor dhe liqenor në atë fushor dhe kodrinor e bëjnë malin e Taraboshit të preferuar për ngjitje nga dashamirësit e natyrës.

RTSH