“Nuk do të ketë tolerancë për personat e gjykuar nga GJKKO”, ka qenë kjo deklarata e kreut të grupit parlamentar të Partisë Socialiste, Bledi Çuçi pas përfundimit të mbledhjes.

Ai u shpreh se mazhoranca është e prerë në këtë çështje.

“Sa i përket GJKKO-së, e kemi thënë nuk do tërhiqemi. Në sensin  që s’do ketë tolerancë për ata që janë gjykuar nga GJKKO. Ai është qëndrim i prerë i joni”, tha Çuçi.

Sa i përket Amnistisë Penale, Çuçi shprehu bindjen se do miratohet, ndërsa shtoi se nëse gjendet dakordësia me opozitën, mund të futet edhe në rend dite në seancën e së enjtes (4 prill).

“E enjte e madhe s’e di unë, por besoj se nëse bëhemi gati do miratojmë ligjin për Amnistinë”, theksoi ai.

Pyetur mbi ligjet e miratuara në seancën e 7 marsit për të cilat u vendos rivotim për shkak të mos plotësimit të kuorumit të nevojshëm, Çuçi u shpreh se janë futur në agjendën e së enjtes dhe do të rivotohen.

“Janë futur në agjendë dhe do rivotohen Ato nuk kërkojnë 84 vota. Ajo është çështje e interpretimit ligjor të kuorumit”, tha ai.

Ndërkohë në lidhje me kërkesën e mazhorëncës për ngritjen e një komisioni të posaçëm për dizinformimin, Çuçi deklaroi se është mjaft i rëndësishëm për të luftuar dizinformimin. AI shtoi se ky komision do i japë një peshë mjaft të veçantë Kuvendit.

“Sot diskutuam një informacion edhe me grupin, për komisionin e posaçëm për mbikëqyrjen e institucioneve dhe veprimtarinë e tyre për të luftuar dizinformimin me qëllim cenimin e standardeve demokratike, apo ndërhyrjet e vendeve jo mike për destabilizimin e Shqipërisë. Besoj është komision që ka rëndësi të veçantë, Komision që PE e ka ngritur që në 2020.

Kemi rezoluta të vendeve demokratike, besoj do jetë një nga komisionet që do i japë peshë të veçantë Kuvendit në lidhje me ketë fenomen iu kthyer në problem edhe në vendet partnere”, shtoi Çuçi.

/rtsh.al/