Kallëzimin në SPAK të padisë ndaj projektit për rindërtimin e kullës pas Teatrit të Operës dhe Baletit, kreu i Partisë Demokratike e konsideron si provën e besimit ndaj kësaj force politike, në Strukturën e Posaçme Antikorrupsion.

Basha deklaroi se lufta ndaj korrupsionit, është e panegociueshme për Partinë Demokratike, teksa shprehu vendosmërinë për të qëndruar përballë kujtdo që shkel besimin e qytetarëve për interesat e veta korruptive.

“Për Partinë Demokratike lufta ndaj korrupsionit është e panegociueshme. Ne jemi të vendosur të përballemi me cilindo që ka shkelur besimin e qytetarëve për t’i hapur rrugë interesave korruptive dhe klienteliste, të cilat janë një kërcënim për mirëqenien e shqiptarëve.

Kallëzimi i sotëm në SPAK i malit të korrupsionit në qendër të Tiranës, është provë e besimit të Partisë Demokratike ndaj institucionit më të rëndësishëm të akuzës. Mbështetja pa kushte ndaj drejtësisë është dëshmi e vullnetit tonë politik për t’i dhënë fund pandëshkueshmërisë dhe për të inkurajuar transparencën mbi lidhjet e dukshme dhe të padukshme mes korrupsionit politik, krimit ekonomik dhe krimit të organizuar.

Askush nuk mund të jetë mbi ligjin”, shkruan Basha në rrjetin social Facebook.

Reagimi i Bashës erdhi pas depozitimit në SPAK nga anëtarja e PD-së në këshillin Bashkiak të Tiranës, Enriketa Papa të padisë ndaj projektit për ndërtimin e kullës pas Teatrit të Operës dhe Baletit.