Akademia e Trajnimeve në Radio Televizionin Shqiptar organizoi me stafin e gazetarëve seminarin me temë “Përdorimi korrekt i gjuhës shqipe”.

Lektoret e RTSH-së, Elona Qose dhe Arta Marku, vunë në dukje problematikat jo të pakta që vihen re në formulimin e një lajmi në Televizion, Radio dhe Ueb.

“Për një media, për RTSH-në në këtë rast, përveç zërit dhe figurës, gjuha është mjeti kryesor i përçimit të mesazheve dhe është shumë e rëndësishme që të përdoren në mënyrën e duhur, në mënyrën e saktë,” tha Elona Qose.

Në pjesën e parë të trajnimit, theksi u vu te ndërtimi i fjalive, rregullat e drejtshkrimit, si dhe përdorimi i shenjave të pikësimit.

“Të gjithë shkruesit ose kumtuesit e lajmit, e formulojnë menjëherë fjalinë jo shqip dhe kjo më duket e çuditshme. Anglishtja ka ndikuar ndjeshëm. Sigurisht është vlerë që të njohësh gjuhë të huaj, por gjithmonë pasi të njohësh shqipen,” u shpreh Arta Marku.

Ky ishte trajnimi i parë në vazhdën e trajnimeve të organizuara nga Akademia e RTSH-së, që lidhet drejtpërdrejt me përdorimin e saktë dhe të drejtë të gjuhës shqipe.

Ky trajnim synon jo vetëm rritjen profesionale të punonjësve në realizimin e produktit radioteleviziv, por edhe si model për t‘u ndjekur në gjuhën e shkruar dhe të folur.

Gazetare: Heriselda Dyrmishi

/RTSH/