Me rastin e përfundimit të misionit në Shqipëri, kryetarja e Kuvendit, Lindita Nikolla, ka pritur sot në një takim kryetarin e Prezencës së OSBE-së, ambasadorin, Vincenzo Del Monaco.

Sipas njoftimit për shtyp nga Kuvendi, kryeparlamentarja Nikolla ka vlerësuar ambasadorin si një mik i mirë dhe partner të spikatur, si dhe ka shprehur mirënjohje për kontributin në zgjerimin e bashkëpunimit mes Kuvendit dhe Prezencës së OSBE-së për avancimin dhe thellimin e reformave, në mënyrë të veçantë të reformës zgjedhore dhe reformës administrative-territoriale.

“Gjatë misionit tuaj në Tiranë, bashkëpunimi mes Kuvendit dhe Prezencës së OSBE-së u intensifikua dhe krijuam një kulturë të re bashkëpunimi, për zbatimin e projekteve e procedurave parlamentare, duke rritur “pronësinë” e kontributit të Kuvendit dhe shërbimeve parlamentare në këtë bashkëpunim. Kjo kulturë e re ka rritur transparencën e veprimtarisë parlamentare dhe qëndrueshmërinë e projekteve e programeve të bashkëpunimit.”,- ka deklaruar Nikolla.

Ambasadori Del Monaco, nga ana e tij, ka falenderuar kryeparlamentaren Nikolla për vizionin e saj në drejtimin e Kuvendit të Shqipërisë, si dhe bashkëpunimin me Prezencën e OSBE-së.

Zyra e shtypit e Kuvendit informon se për vlerësimin e lartë të këtij bashkëpunimi,ambasadori vuri në dukje se Prezenca dhe Kuvendi janë nisur nga qëllimi i përbashkët për të rritur kontributin e Parlamentit në shërbim të zhvillimit të vendit.

/rtsh.al/