Turizmi në Mesdhe po kalon një ripozicionim të dukshëm, ku vende si Shqipëria, Sllovenia, Mali i Zi dhe Qipro po tërheqin gjithnjë e më shumë vizitorë që kërkojnë alternativa më të lira dhe më pak të mbingarkuara krahasuar me destinacionet tradicionale si Spanja, Italia, Greqia dhe Kroacia.

Gazeta prestigjioze franceze “Le Figaro”, shkruan se në veçanti, Shqipëria po shfaqet si një nga tregjet më dinamike në rajon, me rritje të fortë të vizitorëve vitet e fundit. Vendi ofron çmime dukshëm më të ulëta se fqinjët mesdhetarë, me akomodim dhe ushqim që mbeten ende shumë konkurrues, ndërsa po tërheq gjithnjë e më shumë investime në sektorin e hotelerisë.

Riviera shqiptare, qytetet bregdetare dhe zonat historike po bëhen gjithnjë e më të njohura, duke kombinuar plazhe, natyrë dhe trashëgimi kulturore. Megjithatë, rritja e shpejtë e turizmit sjell edhe sfida, sidomos në infrastrukturë dhe menaxhimin e qëndrueshëm të mbeturinave.

Në përgjithësi, rajoni po shkon drejt një faze të re ku “destinacionet alternative” nuk janë më sekondare, por konkurrojnë drejtpërdrejt me destinacionet klasike të Mesdheut.

/rtsh.al/